اللبن قطع منك اوعي ترميييه تعالي اقولك تعملي بيه ايييه

استخدامات اللبن القاطع او الروب..

1★اضربيه في الخلاط مع شوية سكر وكوب زبادي مع اي فاكهه ويبقي زبادو

2★اضربيه في الخلاط مع ملح وهايبقي رايب جهينه

3★ممكن تاكليه بارد وانا بحبه جدا كدا بالمعلقه تحفه

4★اضربيه في الخلاط واستخدميه في تتبيل اللحوم بديل الزبادي

5★اعملي سلطة خضار باللبن الرايب
جزر مبشور وبقدونس وطماطم وفلفل وبصل مقطعين وعليهم لبن رايب ونعناع وزعتر ورشة ملح وزودي رشة حبة البركه وممكن تحطي قطع جبنه فيتا او شيدر او قريش

6★اعجني بيه قرص فلاحي او بيتزا

7★جبنه قريش
هاتغلي اللبن وتحطي م ك خل وملح حسب رغبتك وصفيه في مصفاه وبعد كدا حطيه في شاشه او قماشه نضيفه واربطيها وسيبيه تتصفي خالص وحطيها في التلاجه و بعد كدا استخدميها

8★فكره كمان ممكن تعمليها بنفس الخطوات بس من غير ملح وبعد ماتجمد حطيها في الفريزر ولما تعملي بيتزا ابشريها متجمده هاتديكي نتيجة الموتزاريلا بس مش بتمط

9★فكره كمان اعملي جبنه قريش منغير ملح واستخدميها بديل الجبنه الكريمي للتشيز كيك بتبقي رووووعه

10★ الشرش اللي هاينزل منك اوعي ترميه احتفظي بيه في الفريزر واستخدميه في المعجنات بديل الميه ولو مافيهوش ملح استخدميه في الكيك ..